លោកជំទាវ មាន សំអាន ប្រធានគណៈកម្មការទី៨ព្រឹទ្ធសភា និងជាអនុប្រធានសមាគមនារីកម្ពុជាដើម្បីសន្តិភាព និងអភិវឌ្ឍន៍ បានអញ្ជើញជាអធិបតីក្នុង
ពិធីសំណេះសំណាល សួរសុខទុក្ខ និងចែកចង្ក្រានសន្សំសំចៃថាមពល ជូនប្រជាពលរដ្ឋស្រុកស្ទោងចំនួន៧០៦គ្រួសារ និងបូកសរុប បិទបញ្ចប់ការអនុវត្តគម្រោងបែងចែកចង្ក្រាន សន្សំសំចៃថាមពល និងធុងចម្លោះទឹកស្អាត ដោយឥតគិតថ្លៃជូនប្រជាពលរដ្ឋ ដំណាក់កាលទី១ នៅសាលាស្រុកស្ទោង ខេត្តកំពង់ធំ នាព្រឹកថ្ងៃទី៣០ ខែសីហា ឆ្នាំ២០២៥។

នាឱកាសនោះ លោកជំទាវប្រធាន បានមានប្រសាសន៍នាំយកការផ្តាំផ្ញើសួរសុខទុក្ខពីសំណាក់សម្តេចតេជោ ហ៊ុន សែន ប្រធានព្រឹទ្ធសភា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន សម្តេចកិត្តិសង្គហបណ្ឌិត ម៉ែន សំអន ឧត្តមប្រឹក្សាផ្ទាល់ព្រះមហាក្សត្រ នៃព្រះរាជាណាចក្រកម្ពុជា ឯកឧត្តម អ៊ុច បូររិទ្ធ អនុប្រធានទី១ និងឯកឧត្តមបណ្ឌិត ធន់ វឌ្ឍនា អនុប្រធានទី២ព្រឹទ្ធសភា ជូនចំពោះអាជ្ញាធរស្រុក ប្រជាពលរដ្ឋស្រុកស្ទោងទាំងអស់ប្រកបដោយសេចក្តីនឹករលឹក។

លោកជំទាវប្រធាន បានគូសបញ្ជាក់ថា ការចែកចង្ក្រានសន្សំសំចៃថាមពល ជាអំណោយក្រុមហ៊ុនSIPCO ជូនបងប្អូនប្រជាពលរដ្ឋនាពេលនេះ គឺដើម្បីឱ្យយើងទាំងអស់គ្នាចូលរួមសន្សំសំចៃថាមពល និងការការពារបរិស្ថាន រួមចំណែកការពារសុខមាលភាពរបស់ប្រជាពលរដ្ឋនៅក្នុងមូលដ្ឋាន និងចូលរួមចំណែកក្នុងការកាត់បន្ថយនូវការចំណាយរបស់បងប្អូនប្រជាពលរដ្ឋ។

អំណោយទាំងអស់នោះរួមមាន៖ ចង្ក្រានសន្សំសំចៃថាមពល និងសារុងចែកជូនដល់ប្រជាពលរដ្ឋចំនួន៧០៦គ្រួសារ ព្រមទាំងឧបត្ថម្ភថវិកាមួយចំនួនជូនដល់អាជ្ញាធរស្រុកផងដែរ៕

ប្រភព៖ នាយកដ្ឋានព័ត៌មាន